இந்தியாவிற்கான மூன்று நாள் உத்தியோகபூர்வ பயணத்தின் போது, ஜனாதிபதி அனுர குமார திசாநாயக்க இன்று (15) புது டில்லியில் உள்ள ஐடிசி மௌர்யா ஹோட்டலில் முக்கிய இந்திய அதிகாரிகளை சந்தித்தார்.
இதில் இந்திய நிதி மற்றும் பெருநிறுவன விவகார அமைச்சர் நிர்மலா சீதாராமன், வெளியுறவுத்துறை அமைச்சர் டாக்டர் எஸ்.ஜெய்சங்கர் மற்றும் தேசிய பாதுகாப்பு ஆலோசகர் திரு அஜித் தோவல் ஆகியோர் அடங்குவர்.ஜனாதிபதி திசாநாயக்க மற்றும் அமைச்சர் சீதாராமன் இடையே இந்தியா-இலங்கை பொருளாதார ஒத்துழைப்பை மேம்படுத்துவது மற்றும் இரு நாடுகளுக்கும் இடையிலான முதலீட்டு வாய்ப்புகளை விரிவுபடுத்துவது குறித்து விரிவான விவாதங்கள் நடைபெற்றன.
இலங்கைக்கு மேலும் இந்திய சுற்றுலாப் பயணிகளை கொண்டு வருவது, இலங்கையின் விவசாயத் துறையை நவீனமயமாக்குவது மற்றும் டிஜிட்டல் உள்கட்டமைப்பை மேம்படுத்துவது ஆகியவை குறித்தும் பேச்சுவார்த்தைகள் நடைபெற்றன.டாக்டர் ஜெய்சங்கருடனான ஜனாதிபதி திசாநாயக்கவின் சந்திப்பு நட்புணர்வு சூழலில் நடைபெற்றது.
இலங்கையின் பொருளாதார மீட்சிக்கு உதவ இந்தியாவின் பெரிய சந்தையின் சாத்தியக்கூறுகளை ஆராய்வதில் கவனம் செலுத்தப்பட்டது. சுற்றுலா, முதலீடு மற்றும் எரிசக்தித் துறைகளில் இலங்கைக்கு ஆதரவளிப்பதற்கான இந்தியாவின் உறுதிப்பாட்டை டாக்டர் ஜெய்சங்கர் உறுதிப்படுத்தினார்.
மீன்வளத் துறையை மேம்படுத்துதல் மற்றும் இலங்கையில் தேசிய ஒற்றுமையை வளர்த்தல் போன்ற பரஸ்பர நலன் சார்ந்த பகுதிகளையும் இந்த விவாதங்கள் உள்ளடக்கியிருந்தன.
பின்னர், ஜனாதிபதி திசாநாயக்க இந்தியாவின் தேசிய பாதுகாப்பு ஆலோசகர் திரு அஜித் தோவலை சந்தித்து பிராந்திய பாதுகாப்பு விவகாரங்கள் குறித்து விவாதித்தார்.வெளியுறவு, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் மற்றும் பொருளாதார மேம்பாடு மற்றும் தொழிலாளர் துறை துணை அமைச்சர் பேராசிரியர் அனில் ஜயந்த பெரேரா ஆகியோர் ஜனாதிபதியுடன் இலங்கை அதிகாரிகளாக உடன் சென்றனர்.